mardi 15 avril 2014

SUKMAK


SUKMAK

         Di nla kobol i buk ini le suk ni kal le hala a yé libak li yom li nlel me,yom i nsuk me,yom i nhélés me,hélha jam i ke bisu.

            Di nla kobol i buk ini le mak ni kal le hala a yé jam li ndudu,hala wee u nyi habé i yom i yé ha,yom i nkôôba nhééña libak.Jon u nok le :nlôm ñyéé man a yé mak.Ingéda u nok le,u makbe,hala wee u nsambla ngim yom i nlel we.

            Sukmak a yé ki jôi li Hilôlômbi.Hala wee nyen a yé ño bihégél gwobisôna.Nyen a yé nwet bihégél gwobisôna.Hala wee Nwet Mbog.Bôt ba kôba ba bé sébél ki Hilôlômbi le Sukmak,hala wee mut a nla bé yi nye,mut a nla bé añal nye,mut a nla bé nok nye inyuule mut a gwé bé bibuk bi,bi nkola.

                                                                                  Yaônde,05 matumb 2014

                                                                                  Nkam PONDI PONDI

                                               http://antoinepondipondi.blogspot.com

 

Mbagi i nsôk


MBAGI I NSÔK

 

Lihémle le kel mbagi i nsok i yé i base i sôkbôk ingéda u nwo, u nke nkoñ bawoga. Kii i ñunda bés lisuk li ngéda ? Hala a nkoba lelaa le ngéda i gwé mamélél ? Hala a nlona kii inyuu mut ? Matila ni bi niigana bi mpot lelaa ? I mut a nwo a nke i nkoñ nyemb kaat sokbok i niiga bés le i mut a nsal ngandag, a nyôs ki nyuu i nson, a bumbul ngandag ndi i mut a  nsal ndék a bumbul ndék. Hala wee Hilôlômbi a ngwés bé mut yengi. Inyuu hala nyen bôt ba kôba ba bé ôô bisélél gwap, ba bé bañ bee gwap,  ba bé sal bijek  gwap ndi ba nuñlag bisélél gwap bee gwap, bijek gwap ni maog map ni  nkoñ isi.

Hilôlômbi a nsayap i mut a mbégés mambén mé. Jon i mut a nsal ngandag Hilôlômbi a nsayap i nson wé. Kikii mut a nyi bé kel to ngéda jon bôt ba kôba ba bé lôôs bé ngéda yap biyôglô bi mam tigale nyemb i mpuhe bo. Hilôlômbi a bé i ñem i hikii mam mee. Bôt ba kôba ba bé yi le ba kee i hada Hilôlômbi i mbus nyemb yap.

           

 

 

Yaônde, 25 matumb 2014

                                                                                                              Nkam Pondi Pondi


 

 

 

 

MBAGI I NSÔK

 

Lihémle le kel mbagi i nsok i yé i base i sôkbôk ingéda u nwo, u nke nkoñ bawoga. Kii i ñunda bés lisuk li ngéda ? Hala a nkoba lelaa le ngéda i gwé mamélél ? Hala a nlona kii inyuu mut ? Matila ni bi niigana bi mpot lelaa ? I mut a nwo a nke i nkoñ nyemb kaat sokbok i niiga bés le i mut a nsal ngandag, a nyôs ki nyuu i nson, a bumbul ngandag ndi i mut a  nsal ndék a bumbul ndék. Hala wee Hilôlômbi a ngwés bé mut yengi. Inyuu hala nyen bôt ba kôba ba bé ôô bisélél gwap, ba bé bañ bee gwap,  ba bé sal bijek  gwap ndi ba nuñlag bisélél gwap bee gwap, bijek gwap ni maog map ni  nkoñ isi.

Hilôlômbi a nsayap i mut a mbégés mambén mé. Jon i mut a nsal ngandag Hilôlômbi a nsayap i nson wé. Kikii mut a nyi bé kel to ngéda jon bôt ba kôba ba bé lôôs bé ngéda yap biyôglô bi mam tigale nyemb i mpuhe bo. Hilôlômbi a bé i ñem i hikii mam mee. Bôt ba kôba ba bé yi le ba kee i hada Hilôlômbi i mbus nyemb yap.

           

 

 

Yaônde, 25 matumb 2014

                                                                                                              Nkam Pondi Pondi


 

 

 

 

Yigil i base i sôkbôk


YIGIL I BASE I SÔKBÔK

Ingéda bôt ba kôba ba bi hémle Hilôlômbi le nyen a yé Ntohol wap i gwét a bi hôla bo le ba yémbél i bôt ba bé gwés le ba jôp i base baôm mbom isi, liyéñ yi li yila lem lam i ba mbégés ni tinde le hikii man mee  a nlama  boñ ni bisuglu bi gwé le man mee a noñ mbog bihégél hala  wee a yi liké. Ni bôt ba kôba ba ték mbog ni mimpay mi mbog.

             Yigil i nhôla mut le a yi lelaa i mam a ntehe, a nok, a mboma i ke bisu ma nkobla, ma nke i ke bisu. I ndoñol a nléba, a ntééda yo i nko, i yad, i ke bisu inyuule a boñ habañ minlélém mi dihôha. Jon u nok le : hipa hada,  mbek ibaa, wee u yé jôñ. Mu kikii a nyéñ, a ngwélél toga, yi  i bôt ba kôba  ba nyigle nye, bisai bi Hilôlômbi i ke bisu. Bôt ba kôba ba bé niiga ndugi boonge minson mi moo le bon ba  yiga yiha bo yaani . Jon u nok le :  nkôô  u pédi , u nonga. Sôble nkéñéé man i bé kôs i yaa yé ngobol yé i yé le i tehe mapubi ma Hilôlômbi .  Hilôlômbi a bi ti mut yi ni pék le a sélés boña wé , le a  hôô bañ moo i tôl . Mut a nigil ngim yé niñ. Yigil i nhôla we le u yi bok niñ yoñ, le u niñ longe niñ. Hala wee u ba bañ mpôm mut, mut  litut li mbus kiñ,  wañ mut, lélés mut , nhemb mut, hitégéé i  ke bisu.

 

 

Yaônde, 25 matumb 2014

                                                                                                              Nkam Pondi Pondi


 

 

 

LIBOT NSON


LIBOT NSON

Di mpôdôl hana inyu biloñ bi nneebe ane lingwañ li wim. Inyuu lingwañ li wim, nlébla i ngwiya. Hala a nlôl ni i njel ini le likot masangô li nke ni moni ni ki le nson i yé nkabak, niñ i nke ni bisu ni njel moni saa nlébla a nkôs, hala wee i nlama nôgôl isañ wé nson.

Biiñngin bi mbot bé minson ni bomede ba nkébél bôt ba nsal. Hala a nlôl noñnaga ni libat bôt ba mbat le ba nsomb bisélél biiñngin bi mbañ, ni biiñngin bi pe bi mbat le bi nsomb minlélém mi bisélél bi. Hanyen biiñngin bi nyilis libat i sômba ini minson ba nkébél i bôt ba nyéñ sal lébla. Yak i pémsan i yé i pôla biiñngin bo ni bo i nlona libot nson.

Kédna i mam yon i mboñ le njômbiiI somb nkus i bomna ni bigwel moo bi bôt ba ñee somb bisélél ni liôô bisélél bi yé i nyunga. I mut a nuñul bisélél gwé a nuñul gwo ngim ndamba inyuu i boñ le a sot bañ. Kédna i nhôla mahol ma likot masangô ni i njel ini le mut a somb i sélél a ñee i i yé i nyunga yak i mut a mbañ yo a nuñul sélél yé ndi a laa bot nson. Kédna ngobol yé i yé pôôna. Jon man mee a nkal le tjiimbe i kéda ni nsul, yon i yé mbañ likot masangô, i mbénge balôm ba mam ma likot masongô.

 

                                                                                Yaônde, 19 matumb 2014

                                                                                     Nkam Pondi Pondi

                                                          http://antoinepondipondi.blogspot.com

 

 

 

MAHOL MA LIKOT MASANGÔ


MAHOL MA LIKOT MASANGÔ

 

Inyuu i boñ le likot masangô li hol i nsômbla le u ôô ngandag  bisélél ni ki le u yoñ ngandag bon ba loñ i nson. U nlama yéñ le bisélél gwoñ bi nuñlana le i moni u nkôs u laa saa babôñôl boñ le yak bo ba laa niñ hala wee ba laa je, ba laa tibla, ba laa om boñ bap bisuglu i ke bisu.

 

         I loñ i ngwés ke ni bisu i nlama bana njômbi le man loñ nyekinye a yep bañ ni jis li mbôngôô. Hala a nkobla le hikii man loñ a bana kumba, a laa somb bijek gwé, a laa tibla, a laa tôngôl mboda yé i ke bisu.

 

         Loñ i nlama yéñ le ndék bot bé yon i nlama bana lihat li loñ i nya i yé le ngoo bôt i nene. Ngoo bôt i nsomb habé bisélél loñ i ñôô, bee loñ i mbañ i ke bisu.Minhat mi bôt mi nyéñ le moni wap a hôla bo le ba kônde bana moni i lel balal ba ndamba. Hala wee ba gwé habé nduña le moni wap a hôla i ôô bisélél, i bañ bee, i sal bijek i ke bisu. Ingéda loñ i mpam i homa nunu, i boñ ini i nhol habé inyuule mahol ma likot masongô ma ta habé. 

 

                                                                         Yaônde, 19 matumb 2014

                                                                         Nkam Pondi Pondi

                                                                  http://antoinepondipondi.blogspot.com