jeudi 1 septembre 2011

Liens vidéos

http://www.youtube.com/playlist?list=PL94DAE66E0FCFD61C&feature=viewall

MALAL


Hilôlômbi nyen a bi heg munlôm ni mudaa. Jon malal ma munlôm ni mudaa ma yé longe jam. Malal mana ma ñunda gwéha ipôla munlôm bo mudaa. Inyu hala nyen man mee a bi kal le: ni gwéhna, ni sôôna habé diindi. Hala wee ingéda bôt ba nkal le ba ngwéhna, ba nlama habé sôôna mam.

Malal ma munlôm ni mudaa ma mboñ le munlôm a nyi bilem bi mudaa yag mudaa a nyi bilem bi munlôm.

Malal ma gwé ki nséñ le munlôm a nog mane i nya i yéle nyuu yéé i nsañgla yag mudaa a nog nyuu yéé i nsañgla inyuule a nkwo nyuu. Malal ma mboñ munlôm le a ba maséé nlélém inyuu mudaa. Malal ma nsélés ñem i munlôm ni ñem i mudaa.

I munlôm a ngwés malal i lel balal ba ndamba hala a yé ngim kon. I munlôm a yé wéya, matibla ma yé, mon ba nsébél le likiya. I munlôm nunu a nlama ke yag mut matibla le a ngwés malal ngandag tole a yé wéya.

I mudaa a ngwés malal i lel balal ba ndamba a nkon. Jon i mudaa nunu a nlama ke i tehe mut matibla inyuule ngim bee i yé le mut matibla a tiina nye.

Ngông malal i nlama bé wéha mudaa to munlôm nyuu inyuule malal ma munlôm bo mudaa ma yé ngim jam i ñunda le munlôm ni mudaa ba yé i niñ. Ngim hai i yé le mudaa to munlôm ba nla bôdôl malal.

Bawoga ba nyi habé jam li malal. Malal ma tabé ipôla munlôm a nwo ni mudaa a mal wo.

Yaônde, 25 njéba 2011

Nkam Pondi Pondi

http: //antoinepondipondi.blogspot.com

HÉMLE NI LAP BISAY



Ingéda mut a njôp i lap bisay a nla bégés Hilôlômbi. Hala nyen nhémle base i sôkbôk a mboñ. Ndi mut a nlama bé tjél matibla inyuule a nhoñol le hala a ntéénga hémle yéé. Mut a nlama bégés mambén ma lap bisay inyuu i boñ le a mbôôp.

Nseñ le u niñ i nlama boñ we le u téé bikila bi bijek. Kaat i sôkbôk ni kaat biniigana bi Hilôlômbi bi nsônga bé le ba tibil we i mbus u nsoohe Hilôlômbi, u nogop i ke bisu.

Banga nhémle a nlama kal ngañngañ kon wéé inyuule u sôô kon,u wo wo. U nlama ki unda ngañngañ i homa u nog jôhge. Jon u nlama bé wonyuu i héya mbod ibale ngañngañ a mbat we le u boñ hala. Kon i yé ngim yom ikété niñ i mut. Hala wee mut a niñ bé le a kon bé. Mut a nkon. Mut a mbôôp.

Yaônde,01 hikañ 2011

Nkam Pondi Pondi

http://antoinepondipondi.blogspot.com

MAHEL

Di nla kobol i bug ini le ni kal le hala a nkobla niñ i ndutu. Jon u nog le : mahel mon ma sébla i wañan nyañ le : a ni. Hala wee man nyuu a ngwés to numbee mudaa i héga i nyañ.

Di nla ki kobol i bug ini ni kal le hala a yé ngi bana yom hyes. Jon u nog le: u nsas yep ingéda u nyodag. U nogog ki le: a yep ni kii? A yep ni jis li mbôngôô.

I bug ini i nla ki kobla le hala a yé ngim mam i nyumus we. Jon u nog le : tén e, mapémél imaa, wee u nimil. U nogog ki le : u yé u hel, u gwelba nkok i tjibi.

Di nla ki kobol i bug ini le mahel ni kal le hala a yé ngim yom tole ngim jam i nkéñ ligwelek joñ li jam. Jon u nog le : mahel ma ta ndigi bé le u nol bé, ma yé yag le u nol ndi u nje bé.

Mahel ma yé i bana yom i gwé bé mahee. Kikii ihéga nol mahel. Hala wee u gwéhék nol sô, yom u ntiñil paa to kôôsi ndi ki yom i yé we i mbédgé i mbat yom mahee.

I bug ini le mahel i nla unda we le u gwé ngandag manjel i boñ ngim jam. Inyuu hala nyen u nog le : hiséé hi Ndum Binong hi, hi nke bé ke jam. Hala wee mut ngandag mapék a nhel bé.

Yaônde, 01 hikañ 2011

Nkam Pondi Pondi

http://antoinepondipondi.blogspot.com

MANE MA NIÑ

Bôt ba kôba ba bé je bijek i kel ngand ngwo inyu i unda le ba nhémle le Hilôlômbi nyen a bi heg mut binam.

I jam lini li mbagal we ni mut a nhémle sat. Inyuule pot ni boñ mam ma imaa.

Bôt ba kôba ba bé yi le Hilôlômbi nyen a bi hôla bo gwét, i jôs i bôt ba bé gwés le ba jôp i base i baôm mbom isi.

I gwét bini bi bi tagbe i Ngog Lituba.

Bôt ba kôba ba bé yi le Hilôlômbi a bi heg bo le ba yé mingwélés.

Lije bijek i ngand ngwo kikii Hilôlômbi a bi kal bôt ba kôba, li nti we tohi inyuule u nhoñol mam ma lam Hilôlômbi a bi bôñôl bôt ba kôba.

Ligwelek li bôt ba kôba lini jon li bé boñ bo le ba nnog mane ma niñ. Ba bé kon maséé i ba i niñ ni niñ i ba lémél bo. Inyuu hala nyen bôt ba kôba ba bé néñés bilém. Jon hikii man mee i len ini a nlama néñés dikôô di tan di kembee, ngôi, kôp, mintômba, lolo i ke bisu.

Masoda ni nu a nkil i kokok.

Yaônde, 17 hikañ 2011

Nkam Pondi Pondi

http://antoinepondipondi.blogspot.com

NGÉDA I GWIHA

Ngim ngéda i yé le gwiha bi mpam mut ngandag ingéda ba mbép nye tole ingéda a nson njonok.

Bôt ba kôba ba bé lôôs bé mabii ingéda ngéda i gwiha inyuule mam ma niñ ma nene yubda, mam ma niñ ma nhélés bo. Jon bôt ba kôba ba bé témb yag Hilôlômbi inyu i yi le ba yé bihégél gwéé. Hala a bé boñ bo le ba sélés baboña bap inyu i bana yi.

Ingéda malép ma mal pam mut i mis, malép mana ma mboñ nye le a laa tehe inyuule ndutu yon i nti mut yi. Jon masoohe ma mut a ñee ma nhôla nye i kônde bana banga hémle. A nyi le ingéda a njôp i ndap Hilôlômbi, i ndap ini i ñunda nye le Hilôlômbi a yé mpubi. Jon bôt ba kôba ba bé bégés mambén ma Hilôlômbi.

Yaônde, 06 hikañ 2011

Nkam Pondi Pondi

http://antoinepondipondi.blogspot.com

HILO

Di nla kobol i bug ini ni kal le hala a yé mut, tole nuga tole hiobi a nnoye ndi a nnog bé i mam ma mbôña mbus téntén juu. I mut a yé mbôô a gwéé ngim ngéda a nlama ke hilo. Mut a yé nañak tole nhôôlag mut a nlama ke hilo ngeñ juem. Hala wee mut a nla bé niñ le a ke bé hilo. Jon u nog le, pil hilo mut a nje bé ho.

Hilo hi yé ngandag mintén. Ingéda mut a ntip nañal, a yé i man hilo. U gwé hilo hi mim, hala wee hilo hikeñi, le to ba nkañ we, u nnôgda bé jam. Ingéda mut a yé hilo hikeñi, boña wéé a noye to emel a ñemel bé. U nlama nañal i jiibe inyu i noye longe to nkuu mahop u pot bañ. Ibale mut a gwé hilo hi mbim, a kôli i ha ho i juu. Béé bobasôna ni nke hilo.

Ibale bo mut a nke bé hilo hes, hala a yé soso kon. Ingéda mut a nke bé hilo longe le a yé a boñ, a bumbe tole a nhoo bé ke hilo hala a yé ngim kon. I mut a nkon minkañ i nla pam le a nke bé hilo longe. Jon ibale mut a nke bé hilo ngim kel tole dilo di baa, a nlama ke i tehe mut matibla. Inyuule hilo hi yé nseñ inyu niñ i mut.

Yaônde, 27 hilônde 2011

Nkam Pondi Pondi

http://antoinepondipondi.blogspot.com