lundi 3 août 2009
NJAGI
NJAGI
Di nla kobol i bug ini ni kal le hala a yé mahôla mut a mbat mut numpe ni suhul nyuu. Di nla ki kobol i bug ini ni kal le hala a yé mahôla ma niñ mut a mbat mut numpe le a wo bañ njal, kon i ke ni bisu. Di nla ki kobol i bug ini ni kal le hala a ñunda ngôô mut a gwééne maaisañ to manyañ ingéda ndutu i nkwél nye noñnaga ni mahôla a nti nye. Jon mut a nla yagal nson i ke ni bisu.
Ngim bôt i yé bôt ba likap. Jon u nog le, njagi njok malép ma ipupuga, ba ha we, u ha nlal nyuñ. Hala wee ingéda mut yi a nti bôt bape, a nkôs nyemede. Ingéda mut a nyagal, a nimis libag jé li ngwélés bisu bi mut numpe. Hala wee a nimis ngui yé. Jon ngim mimañ mi bôt mi ngwés bé nimis lipém jap. Ba nwéhél bôt bape le ba nhékda mahoñol map téntén ingéda ba nyi le hala a suhul libag jap. Jon u nog le, njagi i mañ mut, u nyil i mis.
Yom u nlama tééda yo ini le mut a nla yagal ngélé yada inyule i mut a yé kunde a tabé mut njagi, a tabé mut yengi. Njagi i mboñ mut le a gwé bé mban i ke ni bisu.
Yaônde, 28 njéba 2009
Nkam Pondi Pondi
BILEM BI NGWÉLÉS
BILEM BI NGWÉLÉS
Ba nyil ngwélés le a yé mut a nyôs nyu i nson. Ngwélés a yé mut a gwé mban. A yé ki mut a nyônôs i yom a mbôn. A mbégés mbén hala wee a nip bé nteba, a njôp bé i jimb libe, a yé mut ngôô, a nke bé maaisañ to manyañ njôñ, a nsal longe inyu i bumbul longe, a mpot maliga, a yé mut telepsép, a nyoñ bé bitek, a mbégés ni tééda mambén ma Hilôlômbi, a nwo bé nyuu i pot hop wé i ligwéyag, i je bijek bi loñ yé ni i nyo maog ma loñ yé i ke ni bisu.
I mut a yé ngwélés, a ngwés loñ yé, a mbégés matiñ ma loñ yé ni maboñog mé, a mbégés ngeñ, a nyi le mut a nje njék ndi mut a nje bé loñ, a nyi le mahol ma loñ ma mbôdôl ni mahol ma mut, a nyi le yi i ngi nkônde i ntek bé mal. Jon a nlama tila, a nlama añ bikaat, a nlama yéñ inyu léba i mam ma nla boñ nye le a niñ longe niñ i pes bisélél gwé, i pes i ôt mahoñol inyule yi yon i yé mut. A tabé nkol maog, nkol bijek, nkol bôdaa i ke ni bisu.
I mut a yé ngwélés a nyi le niñ i yé sañ. Jon a njo le a nimis bañ bilem bi ngwélés ni i njel ini le a nhôya bé mbog bôt ba kôba to ligwé jé li mbog. A nyi gwel nyemede. Jon a nlel bé balal ba ndamba. A nyi lihaa jé. A yé maséé ni niñ a niñ. A yé mut suhul nyuu. A yé mut a yi bok niñ yé. A tabé mut njagi.
Yaônde, 25 njéba 2009
Nkam Pondi Pondi
LILEEGE MUT NUMPE
LILEEGE MUT NUMPE
Bôt ba kôba ba bé yi le ba nlama leege mut numpe. Ba nyis nye i mbénda. Ba mpom nkôgô le a nyuñ.
Ingéda u nleege mut numpe, hala wee u neebe le we ni nye ni nkwel. Hala wee mut numpe a kal we ngim mam. Mut ikété mam a kal we, mam mahogi ma hôñlaha we bot yoñ i ñem, mam u mbôdôl i ke ni bisu.
U nlama yi le Hilôlômbi a nyônôs i yom a mbôn. Jon u nlama tééda mambén ma Hilôlômbi i boña woñ ni maboñog moñ. Hilôlômbi a nha bibug gwé i nyo i mut numpe inyu i boñ le u yi le to u yé ikété ndutu, Hilôlômbi a nyi le niñ i nke ni bisu. Hala wee Hilôlômbi a nhôya bé we, a nke ni we. A nyi le u mbemb mahôla mé. Jon ikété bôt bape u nleege, wada tole ibaa ba yé bapôdôl ba Hilôlômbi.
Ingéda u nleege mut numpe longe, u yi le yag we mut numpe a leege we longe. Yag we i mam waga añle nye, mape ma hôla nye le a bana banga hémle ni Hilôlômbi. Njombongo a hôla le Hilôlômbi a pôdôs we, a kôm bañ we mbus.
Yaônde, 25 njéba 2009
Nkam Pondi Pondi
http://antoinepondipondi.blogspot.com
KII MUT A NLA HOÑOL ? LELAA A NLA HOÑOL NI I MBEE NSEÑ MAHOÑOL MÉ MA GWÉ ?
KII MUT A NLA HOÑOL ? LELAA A NLA
HOÑOL NI I MBEE NSEÑ MAHOÑOL MÉ MA GWÉ ?
Yom di nyi yo ini le, mahoñol ma bôt ma nkiha ni mangéda. Hala wee niñ bôt ba niñ yon i nti bo mahoñol map. Mahoñol ma bôt ma nkiha ki ni mahop ma bôt. Hala wee mahop bôt ba mpot ma nti bo mahoñol map. Mahoñol ma bôt ma nkiha ni ligwé li mbog. Hala wee ligwé li mbog li nti bo mahoñol map. Mahoñol ma bôt ma nkiha ni hémle. Hala wee hémle i nti bo mahoñol map. Mahoñol ma bôt ma nkiha ni minkôñ nwap. Hala wee minkôñ mi nti bôt mahoñol map.
Mambadga mana ma nhôla bés le boña wés a sal longe, le di bana longe soñnda, le di kônde bana yi le di yi kii i ngwal ngim yom, lelaa ngim yom i nke, inyu kii ngim yom i yé i ngim homa i ke ni bisu.
Yom u nlama tééda yo ini le, yi yon i yé mut. Inyule ngi – yi i nkwéha nkaa. Jon u nlama yi ôt mahoñol.
Yaônde, 29 njéba 2009
Nkam Pondi Pondi
http://antoinepondipondi.blogspot.com
MANGÉN
MANGÉN
Bôt ba kôba ba bé kéne mangén inyu i hola bo le ba niñ longe. Mangén ma ñunda maliga ma hikii yom, ma ñunda libag li basôgôlsôgôl. Mangén ma nhôla man mee le a yi liké ni le a hôya bañ pék ni yi i bôt ba kôba bi, bi yé mangén.
Mangén ma tihba mam ma niñ momasôna. Mangén ma yé banga yigil i niñ. Ba nyi banga man mee ingéda a mpot ndi a kénege mangén. Mangén ma njubus we i nog mbog mee i, i yé nkabag môga imaa. U gwé mbog bihégél ni mbog ndômbôl. Mangén ma ñunda bés le, inyu hikii yom, mut a nlama bé lel balal ba ndamba, mut a nlama yi gwel nyemede, ibôdôl i yi gwel mahoñol, i noñ i yi gwel ñem i pam i yi gwel nyu yé. Ingéda mut a nyi gwel nyemede, hala wee a nyi bok mam mé. Yag loñ mee i bé yi bok mam mé inyule, loñ mee i bé gwélél mangén ma bôt ba kôba. Ba nyil mut i hop ni maboñog mé.
Mangén ma niiga man mee lelaa a nlama yi kena niñ yé. Jon man mee a nlama hoñol mangén ma bôt ba kôba ba bi yigle nye.
Mangén ma nhôla mut i bana soñnda, mangén ma nhôla mut i yi ndoñol i ngim mam, mangén ma nhôla mut i ôt mahoñol ni nyemede ni i mam a ntehe to ma a nog.
Yom mangén ma ñunda, yo ini le, yom yokiyo i nla bé ke longe ibale bo i yom i, i nlel balal ba ndamba. Mangén ma nhôla ki mut ingéda i npam nye le, a nyi habé i yom a boñ tole a nyi habé i yom a nlama kit.
Ingéda u nyi kéne mangén, niñ i nkôhna habé woñi, u nwas libag li maange, u nyila ngwélés inyule biniigana bi mangén bi yé i boga ni boga. Ingéda u nyi ñañ i bôt ba kôba, u nkônde bana yi ni pék. U mboñ habé dihôha di bilôg bisoñ to di bilôg binyuñ, u nyila ngwañ mut ni mpémba mut. Yak loñ yoñ ya yi tééda libag jé li kunde. Hala a yé kimasoda. Hala a yé ki longe jam.
Yaônde, 14 njéba 2009
Nkam Pondi Pondi
SAL LONGE INYU I BUMBUL LONGE
SAL LONGE INYU I BUMBUL LONGE
Nson u nyilis mut ngwélés. Jon mut a nlama sal longe inyu i boñ le a ba kunde. Hilôlômbi a kôm bé we mbus ibale bo ndi u nyan bé nye. Jon u gwélél mambén ma Hilôlômbi inyule Hilôlômbi a nyi mam momasôna, a ntehe mam momasôna, a nog mam momasôna. U nlama niñ ikété mambén ma Hilôlômbi inyule Hilôlômbi a ngwés bé mut yengi.
I yom mut a nsal yon a mbumbul. Jon u nlama bénge i yom u nsal i kel ini, i sondi ini, i sôñ ini, i nwi unu i pes i hop woñ, maboñog moñ, mahoñol moñ i ke ni bisu. Kikii lép i nke i tuye hala nyen yag i yom mut a nti i ntémb i nyeni.
Sal longe hala a nkobla le u njôp bé i njel bitek to i njel nkoda. U nsoohe Hilôlômbi le a unda we mapubi mé. A ti we soñnda ni ngui le u sal ngandag inyu i bumbul ngandag. U bana mban inyule u nhoñol bañ le kikii u nsal len wee wa bumbul len. U bat Hilôlômbi nwéhél inyu mam mabe u bi boñ. Inyule i mam ma, ma nla boñ le u hoo bé bumbul. Hilôlômbi a nhôya bé we ingéda u nsal longe. U nlama yéñ i sal longe ibale u ngwés bumbul longe. Jon u nog le, longe i nimil bé.
Yaônde, 07 njéba 2009
Nkam Pondi Pondi
B’A LIBII LI YÉ MANE ?
B’A LIBII LI YÉ MANE ?
Bôt ba kôba ba bi bot liada ni Hilôlômbi ni i njel ini le man munlôm a nkweeba. I mbus i jam lini, ba niiga nye sôkbôk. Hala wee mambén ma Hilôlômbi ni njee a yé Hilôlômbi inyu man mee. Man munlôm a nyi le a nlama hémle Hilôlômbi, a nlama yi lihaa jé, a nlama bana bôdôl ni Hilôlômbi i ke ni bisu.
Ingéda munlôm a mbii muda, i bôt bana bo ibaa, ba nlama bii ndap yap libii i moo ma Hilôlômbi. Hala wee ba nlama bana bôdôl ni Hilôlômbi. Jon ba nlama soohe nye, ba nlama yéñ mapubi ma Hilôlômbi, ba nlama kapna maséé map ni mandutu map, ba nlama bana bôdôl ipôla yap bibôdlene bi libii jap, ba nlama kwel i ke ni bisu. Muda a nlama yi leege nlôm, a nlama pôdôs nye ni bilonge bi bibug i ke ni bisu. Munlôm a nlama ti nwa makébél i ke ni bisu.
Ingéda mam ma ndap libii ma mpam i mbégdé, babiina ba yi le libii jap li nla ôbi inyu ngandag manjom. Njom bisu i yé le ba nyi bé mahoñol ma mut ba ntjelene. I mut nu a nla yéñ i ôbôs libii lini ni bibéba li maéba, ni mapôdôl mabe, ni ha môô i hié i ke ni bisu. Jon babiina ba nlama yéñ le ba nôgla bibug, ba bana suhul nyu, ba yi nwélana, ba yi dihôha tjap, ba bana mahoñol ma nwee inyu i yi kii i nkéñ le mane ma ta habé i ndap yap libii kikii i kel ba bi at bo libii jap i ke ni bisu. Muda a nlama yi le ibale mbôgna a nkwo, wee nyôl i nkwo.
Ingéda babiina ba nyéñ gwéha i Hilôlômbi, ba yi le Hilôlômbi a kéñ le libii jap li ôbi bañ. Njombongo a boñ le babiina ba bana bôdôl ipôla yap. Bayemlikok a boñ le libii jap li kwo bañ. Batuupék a ti bo yi ni pék le ba nog mane libii jap. Inyule munlôm ni muda ba yé ba biina wee ba nyila mut wada. Mane ma libii ma ntinde babiina i bana ngandag mboda.
Yaônde, 30 hilônde 2009
Nkam Pondi Pondi
http://antoinepondipondi.blogspot.com
LIKE NI HILÔLÔMBI
LIKE NI HILÔLÔMBI
Ingéda mut a nke hala wee a téé bé, hala wee a nke ni bisu, hala wee a nyigis makôô mé ni moo mé. Ingéda mut a neebe ke ni Hilôlômbi, hala wee a neebe niñ ni mambéñ ma Hilôlômbi, hala wee a gwé bôdôl ni Hilôlômbi, hala wee a nti Hilôlômbi mbôgi, hala wee a neebe ke i longe njel. Jon di nla kal le a nhémle Hilôlômbi.
I mut a nke ni Hilôlômbi wee a neebe le Hilôlômbi a gwel nye i woo, le nyen a kena niñ yé. Hala wee yag mahoñol mé, Njombongo nyen a nkena mo. Inyule like ni Hilôlômbi hala a nkobla ki le u nke ni nye i pes i mahoñol le u nkônde bana yi ni pék. Batuupék a nhôya bé we. U nyila hiôdôt hi mbai to lisuk joñ li niñ inyule Hilôlômbi a nsayap i bôt ba nke ni nye ni bôt ba nyéñ nye. Kimaltjai a ñunda we hala niñ yoñ i nkoñ biték ni i nkoñ bawoga.
I mut a nke ni Hilôlômbi a yé mut a nkal nye mam mé malam ni mam mabe a mboñ. A nyi le yom i nkomol bé Bayemlikok. Jon a nigbene Hilôlômbi. Mut a nke ni Hilôlômbi a tabé mut yengi, a yé mut a gwé mban, a nyi ki le a nlama yônôs i jam a mbôn.
Yaônde, 06 njéba 2009
Nkam Pondi Pondi
Inscription à :
Articles (Atom)